Professional Documents
Culture Documents
გარკვეული თვალსაზრისით “საძულველი რვა” ამავე სიაში ეწერება: თითქოს ფილმი “ჯანგოში”
ასახულ, სამოქალაქო ომის ზღვარზე მისულ ამერიკაში შავკანიანთა ემანსიპაციის ტალღას
ომისშემდგომ ვაიომიში გადაისვრის, სადაც, შეცვლილ გარემოებებში მაიორი უორენის ბედიც
სხვანაირად უნდა გათამაშდეს. “ჯანგო” და “საძულველი რვა” გამუდმებით ელაპარაკებიან
ერთამენთს: სიმბოლოებით (სამგზავრო ეტლის სტრატეგიული მნიშვნელობა, რომელიც ვესტერნის
ჟანრის ისეთ კლასიკურ ნამუშევრებსაც გადასძახებს, როგორიც ჯონ ფორდის “Stagecoach”-ია),
პერსონაჟებითა (“ჯილდოზე მონადირეები” - დოქტორი შულცი და ჯონ რუთი), და კონტრასტული
ლანდშაფტებით (ზამთრისა და ზაფხულის ველური დასავლეთის მკაცრი, შემზარავი ხედები,
დაუსახლებელი უნაყოფო მიწები, რომლებიც პერსონაჟებს ექსისტენციალური გამოწვევების წინაშე
აყენებენ). მაგრამ ჭარბი თვითციტირებისა (სიუჟეტის მსვლელობის დიდი ნაწილის დახურულ, ლამის
კლაუსტროფობიულ სივრცეში მოთავსებით ტარანტინო “ცოფიან ძაღლებთან” გვაბრუნებს) და
ნარატივში ავტორის უეცარი შემოჭრის პოსტმოდერნული ჟესტების მიღმა “საძულველი რვის” ახალი
გეზი იკვეთება: მაიორი უორენი ჯანგოს პერსონაჟში განსხეულებული ერთგვარი “ფოლკლორული
გმირის” ნამდვილი ანტიპოდია, რომელიც თავად ქცეულა ჯილდოზე მონადირედ, ხოლო
ომისშემდგომი ამერიკის მიკროკოსმოსი თვალუწვდენელი სამამულო მიწებიდან გალანტერიის
კედლებში იკეტება. განსხვავებულია “საძულველი რვის” ნარატიული სტრუქტურაც: ტარანტინო 6
მოქმედებაში გაშლილ ფილმს კინემატოგრაფიულ “პიესად” გვთავაზობს.
ფილმი რედ როკისკენ მიმავალ გზაზე ქარბუქში მოყოლილი, დათოვლილი ჯვარცმის ჰიპნოტური
კადრით იწყება. ქვემოთ შემოგთავაზებთ, რომ ტანჯვით მოპოვებული ხსნის ქრისტიანული ხატი
სწორედ ის მეტაფორაა, რომელსაც ტარანტინომ ანგარიში უნდა გაუსწოროს. ამ ეტაპზე მხოლოდ ის
შევნიშნოთ, რომ ჯვარცმა ღვთისგან მივიწყებულ, უკაცრიელ მიწაზე მიუტოვებიათ: ტარანტინოს
სურს, ხსნის ქრისტიანული მორალიზმი გზის დასაწყისშივე უკან მოიტოვოს. თუმცა, იქამდე, სანამ
ჯვარცმის ვიზუალ ხატს გავუსწორებდეთ თვალს, ტარანტინო კიდევ ერთ მინიშნებას გვაძლევს
პირველი თავის სათაურის მეშვეობით - “უკანასკნელი ეტაპი რედ როკისკენ”: თითქოს ფილმის
დაწყებამდე ვიგებთ, რომ “საძულველ რვას” ქალაქში არ/ვერ მივყავართ, თითქოს სამართლის
პროცედურული აღსრულება, რომელიც შეპყრობილი დამნაშავის ჩამოხრჩობით უნდა განსხეულდეს,
ძირშივე ფუჭი დაპირებაა. ქალაქის, როგორც ინსტიტუციური სამართლის, “ცივილიზაციის”,
წესრიგისა და კანონების სივრცის “გადადება” - მისი ფუნდამენტური მიუწვდომლობა - ფილმისთვის
სტრატეგიული მნიშვნელობისაა და მას ქვემოთ კვლავ დავუბრუნდებით.
მაიორი უორენისა და ჯონ რუთის შეხვედრით ფილმის ერთ-ერთი ცენტრალური მოტივი, სხეულები
და მათზე დაწესებული ჯილდოები იშლება: სიუჟეტის (არახაზოვან) მსვლელობასთან ერთად ვიგებთ,
რომ საქმე მონეტარულ ენაში გამოსახულ სხეულებთან გვაქვს. თავად მაიორ უორენის სხეულის
ფასი უნიონისტებსა და კონფედერატებს შორის გამართული ბატონ-რუჟის ბრძოლის შემდეგ
რამდენჯერმე დაეცა და ახლა 5000 დოლარი ღირს, შეპყრობილი დეიზი დომერგუს ფასი 10000-ია,
უორენის ნადავლი 8000-ად ფასობს და ა.შ. რუთსა და უორენს შორის გაბმული ნდობის ძაფები
მეტწილად ამ “მონეტარულ ხელშეკრულებაზე” დგას. მოგვიანებით ვიგებთ, რომ ეს უკანასკნელი
ნდობის სიმყარის საკმარისი გარანტი არ არის - ხელშეკრულების სიმტკიცეს ლინკოლნის წერილი
აძლიერებს. როგორც თავად უორენი ამბობს, წერილს კონკრეტული დანიშნულება აქვს: “შავები
მხოლოდ მაშინ გრძნობენ თავს უსაფრთხოდ, როცა თეთრები განიარაღებულნი არიან. და ეს
წერილი მათი განიარაღების ერთადერთი საშუალებაა”. ამრიგად, რუთსა და უორენს შორის
დამყარებული ნდობა უშუალო და უანგარო ნამდვილად არ არის. ის ორმაგად გაშუალებულია - ერთი
მხრივ გაცვლითი ხელშეკრულებით, ერთგვარი საბაზრო ტრანზაქციით, რომელიც ინსტიტუციური
თანასწორობის დისფუნქციურობას ამხელს, და მეორე მხრივ ლინკოლნის წერილით, რომელიც
თავად ამ ხელშეკრულების სიმყიფეს აჩვენებს. ეს ორმაგი სიმყიფე, რომელიც შავკანიანთა
ფორმალური გათავისუფლების შემდგომ ვერტიკალურ, ინსტიტუციურ წესრიგსა და, რასაკვირველია,
ჰორიზონტალურ, ადამიანთაშორის ურთიერთობებს დაეტყო, ამერიკული რასიზმის დამარცხებისკენ
მოკლე, მაგრამ მაინც წინ გადადგმულ ნაბიჯად კი არა, მის შინაგან წინააღმდეგობად უნდა
გავიაზროთ: ფორმალური თანასწორობა რეალური დაქვემდებარების იარაღად გვევლინება.
ტარანტინო ამ შინაგან წინააღმდეგობას თეთრკანიან პერსონაჟთა ლექსიკაში სიტყვა “Nigger”-ის
გამოყენების სიჭარბით აჩვენებს (ხანდახან უორენს ცინიკურად “Major Nigger”-ადაც მოიხსენიებენ).
თუმცა, ტიმ როტის პერსონაჟში რასიზმის ეს შინაგანი წინააღმდეგობა გაცნობიერებული და
რეფლექტირებულია. საგულისხმოა, რომ ოსვალდო მობრი უორენს თავაზიანად,
“პოლიტკორექტულობის” წესების სრული დაცვით, წოდებით მიმართავს, რითაც სტრუქტურული
რასიზმის გაცილებით უკეთ შენიღბულ სახეს აჩვენებს: მისი ბრიტანული აქცენტი კოლონიური
“განათლებული” რასიზმის მარკერია, რომელიც ორმაგ ნიღაბს ატარებს:
I - მობრი აცნობიერებს იმ “პერფორმატულ წინააღმდეგობას” (თავისი ნათქვამის საკუთარი ქცევითვე
უარყოფას), რომელიც მის ცინიზმს ამხელს: გავიხსენოთ სცენა, სადაც მაიორ უორენსა და გენერალ
სმიტერსს შორის დაძაბულობა პიკს აღწევს. ოსვალდო მობრი ეფექტურ გამოსავალს პოულობს -
“ბატონებო, ძალიან გთხოვთ, ბატონ- რუჟის ბრძოლას მინის გალანტერეაში ხელახლა ნუ დავდგამთ.
გთავაზობთ, გალანტერეა ჩრდილოეთ და სამხრეთ ნაწილებად დავყოთ, ბუხარი ჯორჯია იქნება,
ხოლო ბარი... - ფილადელფია!” სხვა სიტყვებით, მობრი აკეთებს იმას, რასაც “ბატონებისადმი”
თხოვნაში უარყოფს - ის ჯერ “დაძაბულობას განმუხტავს”, შემდეგ კი პერფორმატიულად
გამოაცოცხლებს მას.
II - ამ წინააღმდეგობას მობრი სცენაზე დგამს, გაათამაშებს, თავად კი მაყურებლის, პასიური გარე
დამკვირვებლის როლში გვევლინება (“კარგად ვიცი, რომ თქვენ, ამერიკელებს ყველაფრის იარაღით
მოგვარება გჩვევიათ”).
ბანდის წევრებსა და მანიქსს შორის გამართული “სხეულებით ვაჭრობა” ფილმის საწყის წერტილთან
გვაბრუნებს, სადაც ქარბუქში მიტოვებული ჯვარცმის ფიგურა ჯერ კიდევ ბუნდოვან მეტაფორად
მოგვევლინა. ფილმის დასასრულს ტარანტინო ამ მეტაფორას ხატმებრძოლური ჟესტით ანადგურებს:
სამყაროში, სადაც ინსტიტუციური სამართლიანობის აღთქმამ და მისი აღსრულების ფორმალურმა
მექანიზმებმა შავკანიანთა რეალური ემანსიპაციის ნაცვლად რასისტული ჩაგვრის ახალ ფორმებს
მისცა დასაბამი, ხსნის რელიგიურ-მეტაფიზიკური იდეა კიდევ უფრო ცინიკურ დაპირებად მოსჩანს.
“თეთრკანიანთა ჯოჯოხეთს”, რომელშიც ტყვიებშემოცლილი მაიორი უორენი ხვდება, ჯოჯოხეთს,
სადაც “თეთრები თავს მაშინ გრძნობენ უსაფრთხოდ, როცა შავებს ეშინიათ”(მანიქსი), ტანჯვით
მოპოვებული ხსნის იდეით ვერ გამოისყიდი. გამოსასყიდი, რომელსაც ეს ქრისტიანული დაპირება
ხსნის სანაცვლოდ ითხოვს, არანაკლებ დამცინავია, ვიდრე მანიქსისა და ბანდის წევრების ამაზრზენი
“სავაჭრო შეთანხმება.”