Wika at Gramatika, Filipino - Grade 7

Mga Salitang Ginagamit sa Panghihikayat

Layunin

Pagkatapos ng araling ito, dapat na nagagamit mo ang wasto at angkop na wikang Filipino sa pagsasagawa ng isang
makatotohanan at mapanghikayat na proyektong panturismo.

Mga Salitang Ginagamit sa Panghihikayat

May mga pagkakataong nakababasa tayo ng mga tekstong nanghihikayat. Kasabay nito ay nakikilala rin natin ang mga
salita o pangungusap na nakatutulong sa panghihikayat.

Pangatnig ang tawag sa mga kataga o salitang gamit sa pag-uugnay ng isang salita sa kapwa salita, parirala sa kapwa
parirala, at sugnay sa kapwa sugnay.

May Ibat ibang Uri ng Pangatnig na Ginagamit sa Panghihikayat:

Pagbibigay-sanhi o dahilan

Pagbibigay-layunin

Pagbibigay-konklusyon

Pagsalungat

Pagpapatotoo

Pagbibigay-Sanhi/Dahilan

Pinag-uugnay nito ang mga lipon ng salita upang magbigay-katuwiran. Ginagamit dito ang pangatnig na dahil sa, sapagkat,
palibhasa, kasi, at mangyari.

Halimbawa:

Maraming turista ang pumupunta sa Boracay dahil sa mala-kristal nitong buhangin.

Paliwanag:

Ang pangungusap ay nagbibigay ng dahilan kung bakit maraming turista ang pumupunta sa Boracay.

Pagbibigay-Layunin

Nagsasaad ito ng hangarin o naisin. Kabilang dito ang pangatnig na upang, sa ganoon/gayon, nang, at para sa.

Halimbawa:
Upang makahikayat ng mga turista, nagsulong ang pamahalaan ng mga programa nito sa turismo.

Paliwanag:

Ang pangungusap ay nagsasaad ng layunin kung bakit nagsusulong ang pamahalaan ng mga programa sa turismo.

Pagbibigay-Kongklusyon

Nagsasaad ito ng panghuling pananaw o opinyon. Kabilang dito ang pangatnig na samakatuwid, kung kaya, kaya, kung gayon,
at anupat.

Halimbawa:

Samakatuwid, ang pagsulong ng pamahalaan sa mga programa nito sa turismo ay makahihikayat ng mga turista at
negosyanteng dayuhan na pumunta at magtayo ng kanilang negosyo sa Pilipinas.

Paliwanag:

Ang pangungusap ay nagsasaad ng panghuling pananaw ukol sa isinusulong na programa ng pamahalaan para sa turismo.

Pagsalungat

Nagsasaad ito ng pag-iiba, pagkontra o pagtutol. Kabilang dito ang mga pangatnig na pero, ngunit, sa halip, datapwat, at
subalit.

Halimbawa:

Gumaganda na sana ang ekonomiya ng bansa subalit ang pagtaas ng krimen ay nakaaapekto sa panghihikayat ng mga turista.

Paliwanag:

Gumaganda raw ang ekonomiya ngunit isang banta rito ang pagtaas ng krimen, kung kaya't ginamit ang pangatnig na subalit
upang matutulan ang naunang mensahe.

Pagpapatotoo

Nagsasaad ito ng pagpapatunay. Kabilang dito ang mga pangatnig na sa totoo lang at sa katunayan.

Halimbawa:

Sa katunayan, tumaas ang bilang ng mga turista sa bansa at patunay rito ang 1.27 milyong dayuhang turista na naitala sa
unang buwan ng 2013.

Paliwanag:
Pinatunayan ng pangungusap ang mensaheng nais ilahad sa pamamagitan ng patunay na datos at pangatnig na sa katunayan.

Pagbibigay-Kondisyon

Nagsasaad ito ng kondisyon o pasubali. Kabilang dito ang mga pangatnig na kapag, kung, sakaling, sandaling, at basta.

Halimbawa:

Kung masusolusyonan ang grabeng trapik sa Metro Manila, maraming turista ang darayo sa ating bansa.

Paliwanag:

Binibigyang pag-asa ang lahat na maaari pa ring dumami ang mga turista sa bansa.

Maliban pa sa mga pangatnig ay gumagamit din tayo ng ilang pang-abay upang makapanghikayat. Pang-abay ang tawag sa
bahagi ng pananalita na nagbibigay turing sa pandiwa, pang-uri, at kapwa pang-abay. May dalawang uri ng pang-abay na
ginagamit sa panghihikayat, ang panang-ayon (tunay, talaga, opo, oo, sadyang, at totoo) at pananggi (hindi, at ayaw).

Buod

Gumagamit ng mga pangatnig at pang-abay upang tayo ay makapanghikayat. Sa pamamagitan ng mga pangatnig ay nagagawa
natin na magbigay sanhi, magbigay-layunin, magbigay-konklusyon, sumalungat at magpapatotoo. Sa pamamagitan naman ng
mga pang-abay ay nagagawa nating tumanggi at sumang-ayon.