Walo-walo

ni Marielle Salan

Valencia! Valencia!
Duha nalang mularga na!
Singgit sa barker nga apas ra kay komisyon,
Bisan di na maigo, iyaha gyung pugson.

Isbugi! Sikiti!
Luag man ni kay ginagamit pirminte.
Si Ante nga balig duha unta ang pliti,
Di gyud magpagansi.

Ang mag-uyab nga nag-inakbaya, di gyud matarog,

Bisan nagkalisud, di gyud mu-irog,
Sama daw sa ilang relasyon nga way makatay-og,
Hangtud sa kahangturan daw sila magkuyog.

[Boret ra gyud na nga forever na mo!

Wala siguro mo kahibalo
Nga ang entrance ra sa Gaisano
Ang makapahibulag ninyo.]

Samtang kini si Inday nag-inusara,

Way hinigugma, wa sad ubani sa iyang amiga,
Muna-muna sa iyang ginhawa muadtog Valencia,
#ForeverAlone na hinuon ang peg niya.

Si Manoy nga naay bas-kil,

Ang baho sa ilok pud iyang bikil,
Wa gyud mataha sa uban pasahero
Nga naay katungod muginhawa ug hangin nga presko.

Naa puy magbarkada nga hasta ka saba,

Di gyud ni sila mapan-usan ug laway sa baba,
Grabe gyud ang ilang istoryahanay og katawaha,
Mura jud ug wala nay ugma.

Si Dodong mukabit gyud bisan puno,

Wa gyud mahadlok ug siya mahulog og mamumu
Kung ang multicab mupaspas ug dagan,
Yawat nalang daw nga katunga ray iyang bayran.

Ang drayber nagpasutoy aron makabalik ug dali,

Yawat nalang nga siya makabawi,
Kay nitaas na ang presyo
Sa diesel, unleaded ug krudo.

Isa, duha, tulo

Upat, lima, unom, pito.
Isbugi, sikiti!
Kay atong multicab, walo-walo man ni.