Professional Documents
Culture Documents
rettulerunt, Hadrianum Veri scisse genituram et eum, quem non multum ad rem publicam
regendam probarat, ob hoc tantum adoptasse, ut suae satisfaceret voluptati et, ut quidam
dicunt, iuri iurando, quod intercessisse inter ipsum ac Verum secretis conditionibus
ferebatur. 9 Fuisse enim Hadrianum peritum matheseos Marius Maximus usque adeo
demonstrat, ut eum dicat cuncta de se scisse, sic ut omnium dierum usque ad horam mortis
futuros actus ante perscripserit.
IV. 1 Satis praeterea constat eum de Vero saepe dixisse:
Ostendent terris hunc tantum fata neque ultra
esse sinent.
2 Quos versus cum aliquando in hortulo spatians cantitaret, atque adesset unus ex litteratis,
quorum Hadrianus speciosa societate gaudebat, velletque addere:
Nimium vobis Romana propago
visa potens, superi, propria haec si dona fuissent.
3 Hadrianus dixisse fertur "Hos Versus vita non capit Veri", illud addens:
manibus date lilia plenis;
purpureos spargam flores animamque nepotis
his saltim accumulem donis et fungar inani
munere.
4 Cum quidem etiam illud dicitur cum risione dixisse : "Ego mihi divum adoptavi, non
filium." 5 Nunc tamen cum eum consolaretur unus de litteratis, qui aderat, ac diceret :
"Quid? si non recte constellatio eius collecta est, quem credimus esse victurum?",
Hadrianus dixisse fertur : "Facile ista dicis tu, qui patrimonii tui, non rei p. quaeris
heredem." 6 Unde apparet eum habuisse in animo alium deligere atque hunc ultimo vitae
suae tempore a re publica summovere. 7 Sed eius consiliis iuvit eventus. nam cum de
provincia Aelius redisset atque orationem pulcherrimam, quae hodieque legitur, sive per se
seu per sciniorum aut dicendi magistros parasset, qua kalendis ianuariis Hadriano patri
gratias ageret, accepta potione, qua se aestimaret invari, kalendis ipsis Ianuariis perit. 8
Iussusque ab Hadriano, quia Vota interveniebant, non lugeri.
V. 1 Fuit hic vitae laetissimae, eruditus in litteris, Hadriano, ut malivoli locuntur, acceptior
forma quam moribus. 2 In aula diu non fuit, in vita privata etsi minus probabilis, minus
tamen reprehendendus ac memor familiae suae, comptus, decorus, pulchritudinis regiae,
oris venerandi, eloquentiae celsioris, versu facilis, in re publica etiam non inutilis. 3 Huius
voluptates ab his, qui vitam eius scripserunt, multae feruntur, et quidem non infames sed
aliquatenus diffluentes. 4 Nam tetrafarmacum, seu potius pentefarmacum, quo postea
semper Hadrianus est usus, ipse dicitur repperisse, hoc est sumen, fasianum, pavonem,
pernam crustulatam et aprunam. 5 De quo genere cibi aliter refert Marius Maximus, non
pentefarmacum sed tetrafarmacum appellans, ut et nos ipsi in eius vita persecuti sumus. 6
Fertur etiam aliud genus voluptatis, quod Verus invenerat. 7 Nam lectum eminentibus
quattuor anacliteriis fecerat minuto reticulo undique inclusum eumque foliis rosae, quibus
demptumesset album, replebat iacensque cum concubinis vel amine de liliis facto se
tegebat unctus odoribus Persicis. 8 Iam illa frequentantur a nonnullis, quod et
accubitationes ac mensas de rosis ac liliis fecerit et quidem purgatis. quae etsi non decora,
non tamen ad perniciem publicam prompta sunt. 9 Atque idem Ovidii libros Amorum ad
verbum memoriter scisse fertur, idem Apicii, ut ab aliis relatum, in lecto semper habuisse,
idem Martialem epigrammaticum poetam, Vergilium suum dixisse. 10 Iam illa leviora
quod cursoribus suis exemplo Cupidinum alas frequenter adposuit eosque ventorum
nominibus saepe vocitavit, Boream alium, alium Notum et item Aquilonem aut Circium
ceterisque nominibus appellans et indefesse atque inhumaniter faciens cursitare. 11 Idem
uxori conquerenti de extraneis voluptatibus dixisse fertur : "Patere me per alias exercere
cupiditates meas: uxor enim dignitatis nomen est, non voluptatis." 12 Eius est filius
Antoninus Verus, qui adoptatus est a Marco, -vel certe cum Marco- et cum eodem aequale
gessit imperium. 13 Nam ipsi sunt qui primi duo Augusti appellati sunt, et quorum fastis
consularibus sic nomina praescribuntur, ut dicantur nonduo Antonini set duo Augusti. 14
Tantumque huius rei et novitas et dignitas valuit, ut fasti consulares nonnulli ab his
sumerent ordinem consulum.
VI. 1 Pro eius adoptione infinitam pecuniam populo et militibus Hadrianus dedit. 2 Sed
cum eum videret homo paulo argutior, miserrimae valetudinis, ita ut scutum solidius
iactare non posset, dixisse fertur: 3 "Ter milies perdidimus, quod exercitui populoque
dependimus; si quidem satis in caducum parietem incubuimus et qui non ipsam rem
publicam, sed nos ipsos sustentare vix possit." 4 Et haec quidem Hadrianus cum praefecto
suo locutus est. 5 Quae cum prodidisset praefectus, ac per hoc Aelius Caesar in dies magis
magisque sollicitudine, utpote desperati hominis, adgravaretur, praefecto suo Hadrianus,
qui rem prodiderat, successorem dedit volens videri, quod verba tristia temperasset. 6 Sed
nihil profuit. nam, ut diximus, Lucius Ceionius Commodus Verus Aelius Caesar (nam his
omnibus nominibus appellatus est) perit sepultusque est imperatorio funere, neque
quicquam de regia ni mortis habuit dignitatem. 7 Doluit ergo illius mortem, ut bonus pater,
non, ut bonus princeps. nam cum amici solliciti quaererent, qui adoptari posset, Hadrianus
dixisse fertur his : "Etiam vivente adhuc Vero decreveram." 8 Ex quo ostendit aut
iudicium suum aut scientiam futurorum. 9 Post hunc denique Hadrianus diu anceps, quid
faceret, Antoninum adoptavit Pium cognomine appellatum. Cui conditionem addidit,
utipse sibi Marcum et Verum Antoninus adoptaret filiamque suam Vero, non Marco daret.
10 Nec diutius vixit gravatus languore ac diverso genere morborum saepe dicens sanum
principem mori debere, non debilem.
VII. 1 Statuas sane Aelio Vero per totum orbem colossas poni iussit, templa etiam in
nonnullis urbibus fieri. 2 Denique illius merito filium eius Verum, nepotem utpote suum,
qui pereunte Aelio in familia ipsius Hadriani remanserat, adoptandum Antonino Pio cum
Marco, ut iamdiximus, dedit saepe dicens : "Habeat res publica quodcumque de Vero." 3
Quod quidem contrarium his, quae de adoptionis paenitentia per auctores plurimos
intimata sunt, cum Verus posterior nihil dignum praeter clementiam in moribus habuerit,
quod imperatoriae familiae lumen adferret. 4 Haec sunt, quae de Vero Caesare mandanda
litteris fuerunt. 5 De quo idcirco non tacui, quia mihi propositum fuit omnes, qui [vel] post
Caesarem dictatorem, hoc est divum Iulium, vel Caesares vel Augusti vel principes
appellati sunt, quique in adoptationem venerunt, vel imperatorum filii aut parentes
Caesarum nomine consecrati sunt, singulis libris exponere, meae satisfaciens conscientiae,
etiamsi multis nulla sit necessitas talia requirendi.