Anusha Appadithan!

http://www.pustaka.co.in

அனுஷா அப்படித்தான்!

Anusha Appadithan!

Author:

லக்ஷ்மி ரமணன்

Lakshmi Ramanan

For more books

http://www.pustaka.co.in/home/author/lakshmi-ramanan

Digital/Electronic Copyright © by Pustaka Digital Media Pvt. Ltd.

All other copyright © by Author.

All rights reserved. This book or any portion thereof may not be reproduced or used in any manner whatsoever without the express written permission of the publisher except for the use of brief quotations in a book review.

பொருளடக்கம்

அத்தியாயம் 1

அத்தியாயம் 2

அத்தியாயம் 3

அத்தியாயம் 4

அத்தியாயம் 5

அத்தியாயம் 6

1

தமா! உடனே வா. இட் ஈஸ் அர்ஜென்ட்.

சாரதாவின் குரல் தொலைபேசியில் பதட்டப்பட்டது.

என்ன நடந்தது? என்றாள் மறுமுனையில் தமயந்தி.

காலையிலே காலேஜ் போன அனுஷா இன்னும் திரும்பி வரலே.

அவ்வளவுதானே.... சிநேகிதிங்ககூட சினிமா பார்க்கப் போயிருப்பா. வந்துடுவா. கவலைப்படாதே.

மணி பத்தாகுது.

இருக்கட்டுமே, சினிமா லேட்டாகத் துவங்கி இருக்கலாம். நடுவிலே பவர் கட் ஆகி தாமதமாகி இருக்கலாம்.

தமா!

சொல்லு சாரதா

நான் கவலைப்படறதுக்குக் காரணம் இருக்கு.

என்ன?

அவளுக்கு எம் மேலே கோபம்.

சின்னப் பெண்தானே, சரியாயிடும்.

அவள் பதில் சொல்லாமல் அழுதாள்.

அழறியா சாரதா?

.............

சித்தார்த் போன் பண்ணினாரா?

ம்ஹூம்

அவர் பேசினால் அனுவைக் காணோம்னு சொல்லி இது மாதிரி அழாதே. ரொம்ப ஷாக் ஆயிடுவார்.

இல்லே என்று சற்றுத் தயங்கிவிட்டு.

அனு ஏடாகூடமாய் ஏதாச்சும் செய்துக்கிட மாட்டாளே என்றாள்.

யூ மீன் தற்கொலையா?

ஆமாம்.

எனக்கு உன்னை விட அனுவை நல்லாத் தெரியும். ரொம்ப தைரியமான பெண். அனாவசியமா எதையாச்சும் கற்பனை பண்ணிக்கிட்டுக் குழம்பிப் போகாதே – சாரதா.... வர்ஷா - என்ன செய்துக்கிட்டிருக்கா?

அனுஷாவுடைய அத்தனை சிநேகிதிங்களுக்கும் போன் பண்ணிப் பார்த்துட்டா, அங்கே எல்லாம் அவள் போகவே இல்லே, இப்போ தேடப் போறேன்னு கிளம்பிக்கிட்டிருக்கா.

இந்த நேரத்துலே அவளைத் தனியா அனுப்பாதே. நான் வந்தபிறகு என்ன செய்யலாம்னு யோசிக்கலாம்.

சரி. சீக்கிரம் வா தமா.

அவள் இன்னும் அழுது கொண்டிருந்தாள் என்பது குரலிலேயே தெரிந்தது.

சாரதா தைரியமானவள். நினைத்ததைச் செய்து முடிப்பவள். நடுவில் எந்த இடர்ப்பாடு வந்தாலும் அவள் சோர்ந்து போனதில்லை.

சின்னக் கவலைகள் அவளை அத்தனை எளிதில் அசைத்துவிட முடியாது.

அவளே அழுகிறாள் என்றால் விஷயம் கவலைக்குரியதுதான்.

அப்படி என்ன நடந்திருக்கும்?

மறுபடியும் தாய்க்கும் மகளுக்குமிடையில் என்ன தகராறு.

அந்த உறவில் விரிசல் விழ யார் காரணம்...? சாரதாவா.... இல்லை மகள் அனுஷாவா?

ஜன்னல் வழியாகக் குளிர் காற்று வந்து உடலைச் சிலுப்பியது.

அதை மூடி விட்டு அலமாரியைத் திறந்து மெல்லிய கம்பளிச் சால்வையை எடுத்து தமா தோள் மீது போட்டுக் கொண்டாள்.

இரவு நேரங்களில் பெங்களூர் நகரம் எப்போதுமே குளிரின் பிடியில் சுருண்டு கொள்ளும். அதுவும் நவம்பர் முதல் மார்ச் வரையில் கேட்கவே வேண்டாம், பொழுது சாய்ந்த பிறகு எங்கு போவதானாலும் தற்காப்புக் கவசமாய் ஒரு சால்வையாவது தேவைப்பட்டது.

சாரதா வீட்டுக்குப் போனால், அனுவைக் கண்டுபிடித்து அழைத்துக் கொண்டு வந்து விடும் வரையில் வீடு திரும்ப முடியாது என்று தோன்றவே, இரண்டு நாட்களுக்குத் தேவையான புடவை இரவிக்கை இதர அன்றாடத் தேவைகளை எடுத்துப் பையில் திணித்துக் கொண்டாள். உடன் வேலை பார்த்த லீலாவுக்கு போன் செய்து, தான் இரண்டு நாட்கள் அலுவலகம் வர இயலாது என்று தெரிவித்தாள்.

சமையலறையில் காஸ் அடுப்பு