Poovodum Pottodum

http://www.pustaka.co.in

பூவோடும் பொட்டோடும்

Poovodum Pottodum

Author:

அனுராதா ரமணன்

Anuradha Ramanan

For more books

http://www.pustaka.co.in/home/author/anuradha-ramanan

Digital/Electronic Copyright © by Pustaka Digital Media Pvt. Ltd.

All other copyright © by Author.

All rights reserved. This book or any portion thereof may not be reproduced or used in any manner whatsoever without the express written permission of the publisher except for the use of brief quotations in a book review.

பொருளடக்கம்

அத்தியாயம் 1

அத்தியாயம் 2

அத்தியாயம் 3

அத்தியாயம் 4

அத்தியாயம் 5

அத்தியாயம் 6

அத்தியாயம் 7

அத்தியாயம் 8

அத்தியாயம் 9

அத்தியாயம் 10

பூவோடும் பொட்டோடும்

1

"கெளரி கல்யாணம். வைபோகமே...

லட்சுமி கல்யாணம்... வைபோகமே...

-ஊஞ்சல் முன்னும் பின்னுமாய் சிற்றசைவாய் அசைந்து கொண்டிருக்க, மாலையும் கழுத்துமாய் ஊஞ்சலில் அமர்ந்திருந்த மீரா, பக்கத்திலிருந்த தியாகுவை லஜ்ஜையுடன் பார்த்தாள்.

நம்ம குடும்பத்துலேயே இல்லாத சிவப்பு... உசரம்... தர்மராஜன் கடைசியில பிடிச்சாலும் பிடிச்சார்... புளியங் கொம்பாய் பிடிச்சிட்டார்..."

மாப்பிள்ளை என்ன வேலையில இருக்கார்....

யாருக்கு வேணும் ஒய் வேலை... அதெல்லாம் நம்மளைப் போல பத்தாம் தேதிக்குள்ள, சம்பளப் பணமெல்லாம் காலியாகி, 'சிங்கிள் டீ’க்கு சிங்கி அடிக்கிறவங்களுக்குண்ணா... இது பெரிய பண்ணைங்காணும்... திருச்சியில பொன்னு விளையற பூமி... ஆயிரம் ஏகராவுக்குக் குறையாது... அப்படியே மலைக்கோட்டை வழியா வந்தேயின்னு வச்சுக்க... வரிசையா நாப்பது கடை... இவங்களுதுதான்... தெருவுல நடந்து போனாலே, கடைக்காரங்க அத்தனை பேரும் எழுந்து நின்னு கும்பிடுவாங்களாம்...

அடேங்கப்பா.. எப்படிய்யா பிடிச்சான் தர்மராஜன்...

அவர் எங்கே பிடிக்கறது... உட்கார்ந்த இடத்தைவிட்டு கொஞ்சம் தள்ளி உட்காருய்யான்னு கேட்டாலே- அவருக்கு பிருஷ்டத்துல கட்டியிருக்குங்கறதுல ஆரம்பிச்சு, ஹார்ட் வால்வு கார்ப்பரேஷன் குழாக் கணக்கா அடைச்சிட்டிருக்குங்கறது வரைக்கும் பார்ட், பார்ட்டா சொல்ல ஆரம்பிச்சிடுவாரே... எல்லாம் பெண்ணோட அதிருஷ்டம்.

நான் நினைக்கிறேன்யா. அந்தப் பொண்ணுக்கு சந்திர மங்கள யோகம் இருக்குன்னு... ஒரு தடவை ஜாதகத்தை வாங்கிப் பார்த்துடணும்... இல்லையின்னா காசி அன்ன பூரணி கையில, தங்கக் கரண்டிக்குப் பதிலா, இரும்பு ஜாரிணிக் கரண்டியக் கொடுத்தாப்பல... எப்படிய்யா இப்படியொரு சம்பந்தம்...

கல்யாணப் பெண்ணின் பக்கத்திலேயே நின்று பேசுகிறோமே என்கிற விவஸ்தை இல்லாமல் பேசுகிற கும்பல்...

எல்லாக் கல்யாணங்களிலுமே இதுபோன்ற கும்பல் இல்லறத்தில் அடியெடுத்து வைக்கும் இளசுகளை வாழ்த்துவதற்காக வராமல் வம்பு பேசுவதற்காகவும், இவன் எப்படித்தான் தன் வீட்டுக் கல்யாணத்தை நடத்துகிறான் என்று வேடிக்கை பார்ப்பதற்காகவுமே வரும்...

இங்கேயும் எல்லாம் உண்டு...

மீராவைச் சேர்ந்தவர்கள்- கோடீஸ்வர சம்பந்திக்கு பிட்சாதி பதி தர்மராஜன் எப்படி ஈடு கொடுக்கிறார் என்று பார்க்கவும்...

தியாகுவின் வீட்டார்- கடைசியில இந்தப் பையனுக்கும் பொண்ணைக் கொடுத்த மனுஷனைப் பார்க்கணுமே என்கிற ஆசையிலும் கல்யாணத்துக்கு வந்திருந்தனர் என்றால் மிகையே இல்லை.

தியாகுவுக்கு எப்படியோ, மீராவுக்கு கணவனின் வாட்ட சாட்டமான உருவமும், மஞ்சள் கலந்த பொன்னிறமும், குழந்தை போன்ற முகமும், மனசுக்குள் வெட்கமும் சந்தோஷமுமாய் கலந்து நீரூற்றாய் பொங்கிய அதே நேரத்தில்...

அம்மாவும் அப்பாவும் பேசிக் கொண்டதைக் கேட்டதிலிருந்து ஏற்பட்ட பயமும் நெஞ்சுக்குள் குமிழியிடாமல் இல்லை.

முந்தா நாள், எங்க அக்கா வந்திருந்தா... அவதான் சொன்னா... இத்தனைப் பெரிய எடம். இத்தனை லகுவாக் கிடைச்சிருக்காதுடீ காமாட்சி... உள்ளே ஏதோ விஷயம் இருக்குன்னு...

இதப் பாரு... இத்தனை தூரம் கோடிச்சு, கல்யாணப் பத்திரிக்கை கூட அச்சடிச்சாச்சு, இப்ப வந்து அக்கா சொல்றா... ஆட்டுக்குட்டி சொல்றதுன்னு எதையும் என் காதுல போடாதே... நான்தான் முன்னாடியே சொல்லிட்டேனில்லே... பையனுக்கு அந்த ஒரு குறைதான் இருக்கு... வேற ஒண்ணுமே இல்லே. உங்க அக்காவுக்குப் பொறாமை... உனக்கு, பெரிய எடத்துல சம்பந்தம் கிடைச்சிருக்கிறதுனாலே...

தர்மராஜன் இன்னும் கூட ஏதாவது பேசியிருப்பார். மகள் அந்தப் பக்கமாய் வருவதைக்கண்டு, அப்படியே வார்த்தைகளை விழுங்கிவிட்டார்.

ஆனாலும், மீராவினால் இந்தப் பேச்சை அப்படியே விட முடியவில்லை. இரவு எல்லோரும் தூங்கியதும், மெல்ல எழுந்து வந்து தாயின் பக்கத்தில் படுத்தாள். சற்றே படுத்து தளர்ந்த அம்மாவின் இடுப்பில் கை போட்டு, அப்படியே