Vry-

vry-

gilbert gibson

Human & Rousseau

Die uitleg van gedigte in hierdie digitale uitgawe van vry- mag verskil van dié van die gedrukte uitgawe, afhangende van die instellings op u leestoestel. Die uitleg vertoon optimaal indien die standaardinstelling op u leestoestel gebruik word. Lesers kan egter eksperimenteer met die instellings vir verskillende perspektiewe op die gedigte.

die vrystaat het ’n horison voor eendag weer ’n see

en alhoeminder aarde wat ouer word in die geheue van

water/ wat voor die rant fonteine bedoel/ en tot stof

jou voete vergader// waar leë parke die slaap

van biblioteke namaak/ tot anderkant die wilgerbome

by die spruit/ waar die hart bedaar en skeibare vulkane tot

niks versaak// die horison lê bedags soos woede voor die deur

soos honde uitgestrek in die tuin/ ’n anderheilige soek na

iets wat water/ onder formele tegniek bedek// die brein

is ’n gedaante wat aspirasies faal/ wat in die styl

van vlakte nie lig in jou oë verbeel nie/ en dus snags

jou slaafsbemin/ die horison van binne af, in

I

die vry-

die vry-

staat het ’n horison

waarvoor ek oor die stoep kan kyk

die horison is ’n verknoopte skoenveter

wat ’n mens deursny met ’n rooi knipmes

die horison is jou tong

die horison staan in die lug voor ’n fluitspeler,

maak jou vir slange bang

die horison is subtiel soos ’n sweempie

stof op ’n baadjie se skouer

dit herroep die droogskoonmaker

die horison lê soos ’n gevalle mas

wanneer die anker lig

lê bedaard soos ’n galg

en jy is die dood

as kind ongewoon

as kind ongewoon met ma afgevlieg kaap toe

vir vreemde familie gaan kuier van

bloemfontein af soontoe met die boeing en terug met die viscount

vergesel deur ’n meeslepende teater van teddiebere en kinderklere

wat vandag op die plaveisel van lughawes lê.

bel jare daarna vanaf die vibrerende rand/ van ’n

bedkassie die stem raak in die donkerte weg

soos iemand wat in jou arms sterf arme arms

dit is gevaarlik om alleen te slaap

meer gevaarlik as om alleen te reis

die teddiebere is by die lost and found

ons vlieg meer geredelik, kompakte bagasie

soontoe met die boeing, terug met die viscount

ry een april uvongo toe

ry een april uvongo toe. die naam is ’n

paradys waarvan diere droom/ langs die